Nâlân Olduğum

Bezm-i gamda ruz-u şeb ney gibi nâlân olduğum
Şem'-veş tâ subha dek sûzân u giryân olduğum
Aşk ile Mecnûn-sıfât dillerde destân olduğum
Hep seninçindir benim yolunda kurbân olduğum

Alem içre Adem'in Havvâ'ya meyl ü vuslatı
Bunca mahlûk ile bu zulmet-i serânın kesreti
Mihr ü mâhın gerdişi mülk-i cihânın ziyneti
Hep seninçindir benim yolunda kurbân olduğum

İmtizac etdiği âb u âteş ü hâk ile bâd
Rûh-ı pâke hiss-i hayvânîden olan ittihâd
Çâr mâder üç veled dünyaya gelmekden murâd
Hep seninçindir benim yolunda kurbân olduğum

Gûne gûne levh-i hestîden görünen nakş u reng
Nakş-bendân-ı nigâristân-ı A'câm u Fireng
Dâyimâ ahbâb u a'dâ içre bunca sulh u ceng
Hep seninçindir benim yolunda kurbân olduğum

Her seher bülbüllerin gülşende şeydâlandığı
Goncalar nâziklenip güller mutarrâlandığı
Ehl-i tab'ın nazım u eş'âr ile gûyâlandığı
Hep seninçindir benim yolunda kurbân olduğum

Göz açıp hâb-ı ademden dîde bîdâr olduğu
Cür'adân-ı dil mahabbetden pür-esrâr olduğu
Cân-ı Aşkî dâm-ı hâkîde giriftâr olduğu
Hep seninçindir benim yolunda kurbân olduğum

Aşkî